Høvuðsvenjarin hjá KÍ, Magnus Powell, segði alment eftir, at Daniel Johansen hevði skift til KÍ, at hetta væntandi ikki bleiv síðsta tilgongdin í summar. Og navnið sum ofta gekk aftur í søgunum var Jóannes Bjartalíð, sum ikki hevur spælt nakran dyst fyri Fredrikstad í 2025 vegnqa skaðar og har sáttmálin gongur út eftir hetta kappingarárið. Vit hava spurt Jóannes um hesar søgurnar, men hann vísir avgjørdur aftur, at nakað er í hesum.

- Eg hati at skuffa fólk, men eg kann við vissu siga, at eg skifti ikki felag í summar, sigur Jóannes Bjartalíð í stuttari viðmerking við Norðlýsið.

Hann sigur, at hann er byrjaður spakuliga at venja fótbólt aftur og vóni at verða klárur til næsta dyst.

Fredrikstad liggur á 4. plássi og spælir aftur 22. juni á útivølli móti Viking.