Fyrrverandi U21-landsliðsleikarin, Børge Petersen, hevur spælt sín síðsta dyst fyri KÍ á hesum sinni. Tað hava vit fingið upplýst frá góðum keldum.

Børge hevur ongan minutt spælt á besta liðnum í ár, og hann hevur heldur ongan dyst verið í dystarhópinum. Á næstbesta liðnum hevur hann sambært FaroeSoccer spælt seks dystir. Síðstu tíðina hevur hann ikki verið at sæð til venjingar hjá KÍ, og tað hevur sett ferð á søgurnar um, at hann ikki heldur fram í KÍ.

Børge gongur í skúla í Havn, og tað ljóðar nú, at 23 ára gamli miðverjin fer at spæla við einum havnaliði framyvir. Sambært okkara upplýsingum væntast Børge at fara at venja við B36 í hesi vikuni, og tað er sum oftast eitt tekin um samstarv framyvir. Tað hevur eisini ljóðað, at NSÍ hevur víst stóran áhuga at fáa Børga í sín hóp.

Børge Petersen hevði helst sítt besta kappingarár í 2023, tá hann í fleiri av altjóða dystunum spældi ein stóran leiklut í nøkrum av størstu úrslitunum í søguni hjá KÍ.