Í KvF var at síggja mánakvøldið, at tey hava fingið eini túsund tons afturat at virka, og dagarnir eru langir, frá kl. 6:30 til 17:00, altso 10½ tíma. Jógvan Hansen, rakstrar- og sølustjóri í JFK-samtakinum, sigur, at tað er ein góð og positiv gongd, tey hava sæð seinastu 4-6 vikurnar, og hann vónar, at gongdin heldur fram gjøgnum summarið.

Tað hevur annars verið stak trupult fyri partrolararnar í longri tíð, og stór tap hava verið at sæð í fleiri ár, so hesar góðu vikurnar koma ómetaliga væl við, men har skal meira til fyri at venda gongdini. JFK er blivið hart rakt av broytingini í sjófeingislógini, ið ger, at tey í JFK ikki fáa keypt sær fleiri dagar, tí tey sleppa ikki at vaksa. Annars kundu tey hugsað sær at fingið størri skip. Við Kringvarpið segði Jógvan Hansen mánakvøldið, at:

– ”Vit hava ein gamlan partrolaraflota, og vit ynskja sjálvandi at skifta hann út, men vit eru vorðin hart rakt av broytingini í sjófeingislógini, og tað hevur við sær, at vit ikki fáa keypt fleiri dagar, tí vit fáa ikki vaksið, so vit høvdu ynskt okkum onkrar broytingar í lógini. Har hevði tað mest spennandi verið at fingið tað gjørt soleiðis, at farið varð frá at rokna fiskidagar sum longd × breidd × dýpd × motorstødd, tí tað ger tað trupult at skifta bátarnar út. Hevði man í staðin kunnað lagt bátarnar saman og í staðin fyri brúkt eitt pelatrekk, og á tann mátan faldað tað upp við fiskidagar, so fingu vit munandi betri umstøður, og kundu skift út við ein størri trolara, sum kundi fiskað við dupulttroli. So fóru 15 mans við, sum høvdu góðar umstøður umborð, eins og tað hevði verið nógv betri fyri okkum.

So hevði partrolaraflotin heilt sikkurt verið skiftur út so við og við”, sigur Jógvan Hansen at enda.

Kelda: Rokast í upsa og gulllaksi