Hvørt ár vitja fleiri túsund børn, ung og eldri Leguhúsið í Nesvík – og nógv av arbeiðinum verður gjørt av sjálvbodnum. Herímillum verður eisini eitt stórt sjálvboðið arbeiðið gjørt fyri at halda leguhúsið við líka og støðugt at menna umstøðurnar fyri tey mongu børnini, sum koma á summarlegu í summar. 

Tí er siður at hava ein arbeiðsdag áðrenn summarlegurnar verða skotnar í gongd. Her verður heitt á øll, ið hava áhuga, at møta upp at hjálpa eftir førimuni. Talan er um alskyns uppgávur so sum reingerð, viðlíkahald, at lyfta, bera, rudda, skrúva, v.m. – og øll kunnu vera við so leingi, sum tað liggur fyri.

Byrjað verður við morgunmati og eini andakt klokkan 9.00. Síðani verður farið í gongd við arbeiðið. Á middegi verður døgurði, og arbeiðsdagurin endar klokkan 16.

Til arbeiðsdagin í fjør møtti ein rúgva av fólki upp, og í góðveðrinum varð arbeitt bæði úti og inni.

Fyri matgerðina er best, um fólk boða frá luttøku á telefon 230076 ella til sigvald@mission.fo.

Takk, um tú vilt koma við at veita eina hjálpandi hond til arbeiðsdagin.