Eftir tilmæli frá landsstýrismanninum í almanna- og mentamálum hevur landsstýriskvinnan í heilsumálum nú tilnevnt Magna Højgaard sum nýggjan lim í Etiska ráðnum.

Magni Højgaard er 44 ára gamal og starvast sum leiðari í Rówt. Rówt er eitt uppsøkjandi og samskipandi tilboð til ung í Føroyum við álvarsomum avbjóðingum innan sálarheilsu og bundinskap. Hann hevur áður verið leiðari á sosialu eindini hjá Bláa Krossi Føroya (2015–2019), og hevur harumframt drúgvar royndir úr Danmark, har hann arbeiddi á Mændenes Hjem á Istedgade í Keypmannahavn.

Við tilnevningini av Magna Højgaard fær Etiska ráðið ein lim við breiðum innliti í sosialar og heilsuligar spurningar og við hollum royndum úr arbeiðinum við menniskjum, sum ofta liva á útjaðaranum av samfelagnum.

Um Etiska ráðið
Etiska ráðið hevur 9 limir. Ráðið verður valt av nýggjum eftir 4 árum.

Etiska ráðið hevur til endamáls at fremja og styrkja kjak og vitan um etiskar spurningar, ið knýta seg til heilsufakligt virksemi á heilsuøkinum, almannaøkinum og kommunala økinum. Harumframt hevur ráðið til endamáls at gera almennar myndugleikar og borgarar betur førar fyri at taka støðu í etiskum spurningum.

Hesi eru limir í Etiska ráðnum:

Bergur Debes Joensen, sóknarprestur, formaður
Marjun Asbjarnardóttir Lómaklett, sóknarprestur og integratiónsprestur,
Jógvan D. Hansen, heimsspekingur
Magni Højgaard, leiðari í Rówt
Jóngerð Guttesen, leiðari í Roðanum
Noomi Gregersen, verkætlanarleiðari í Fargen
Arni Zachariassen, rúsviðgeri
Súsanna Mortensen, námslektari í sjúkrarøktarfrøði
Katrin Kallsberg, serlækni í kvinnusjúkum og burðarhjálp