Fleiri íbúðir ávegis í Klaksvík
Í hesum umfari er talan um 4 nýggjar íbúðir, sum koma niðan Horn. Klaksvíkar kommuna lýsti lendi til sølu í mai, og inn komu trý uppskot. Á seinasta býráðsfundi, sum var síðst í juni, samtykti eitt einmælt býráð at taka av tilboðnum frá Malltek.
Í lýsingini stóð, at tað var upp til tey bjóðandi at koma við skitsuuppskoti um, hvussu byggingin bleiv skipað, men við kravi um, at byggingin skuldi skipast sum íbúðabygging við 4 búeindum sambært byggisamtyktini.
Skitsuuppskotið frá Malltek varð væl lýst, og varð í einari heildarmeting mett best.
4 íbúðir umleið 95 – 100 m2
Talan er um íbúðir við framúr útsýni, har tað eru tvey kømur, køkur/stova, vesi, gongd, tøknirúm, umframt skúrar. Byggingin er uppdeild í tveir bygningar, ið eru knýttir saman av eini trappugongd, sum gevur lívd og eitt rúm sum íbúgvarnar eru felags um.
Metingarbólkurin legði í metingin dent á, at byggingin fellur væl inní lendið og verandi grannalag. Tilfarsvalið er væl valt, og gevur eitt nýmótans og norðurlendskt úttrykk, umframt at byggingin tekur atlit til veður og sólarljós.
Økið er uml. 630 m2 til støddar, og kostnaðurin fyri økið, sum verður selt til Malltek, er kr. 1.150 kr/m2, t.v.s. kr. 724.500,-.
Væntandi verður matrikuleringin komin uppá pláss aftaná summarfrítíðina, so Malltek endaliga kann keypa lendið og fara undir verkætlanina.