Oddvør luttók í bæði 100m og 200m renning, har hon í báðum førum rann seg í finaluna. Hon gjørdist harvið fyrsta føroyska kvinnan nakrantíð at renna seg í 100m finaluna á Oyggjaleikum.

Maria rann 400m og 400m rimarenning. Hon tryggjaði sær finalupláss í 400m, men rakk ikki heiðursmerkja plássunum. Í 400m rimarenning var hon tó heilt suveren – har vann hon gull og setti nýtt føroyskt met.

Oddvør og Maria luttóku eisini í bæði 4x100m og 4x400m boðarenning. Í 4x400m vann føroyska liðið eitt flott bronsuheiðursmerki, og settu samstundis nýtt føroyskt met.

Rutt var av fyrsta sinnið við á Oyggjaleikum, har hon luttók í bæði 5000m og 10.000m renning. Hon hevur seinastu tíðina víst framstig, og kom hetta til sjóndar tá hon á 5000m renningini setti nýtt persónligt met, við tíðini 18:22 min

Julian luttók í 1500m, 5000m og hálv maraton. Í 1500m tryggjaði hann sær eitt pláss í finaluni har hann endaði á einum 4. plássi. Í 5000m rann hann seg til eina bronsu í eini taktiskari renning. Bert 12 tímar seinni stóð hann á startstrikuni aftur – hesa ferð til hálvmaraton. Har megnaði hann enn einaferð at vinna eina bronsu. Hálvmaraton taldi eisini sum liðkapping. Her vann føroyska liðið við Julian, Rógva og Nela eitt gullheiðursmerki.