Herfyri kom tað fram, at ein rúgva av lutum úr m.ø. USA, Japan, Schweiz, Suðurkorea og Australia eru funnir í russiskum kryssaramissilum. Missilið S8000-Banderol verður longu brúkt ímóti ukrainskum býum, og tað ørkymlar ukrainarar, at vesturlendskir lutir finna vegin fram til krígsmaskinuna hjá Putin.

Trygdartænastan hjá ukrainsku hermegini finnur framvegis russisk vápn, sum eru full av vesturlendskari tøkni. Hetta hóast, at sagt hevur verið, at sanktiónirnar móti Russlandi skuldu steðga tí. Olena Bilousova, sum er seniorgranskari á Kyiv School Economics, sigur, at tað hevði verið øgiliga dramatiskt fyri Russland, um russarar ikki fingu fatur á hesum komponentunum; fleiri av teimum eru sjálvir ”heilin” í russisku vápnunum, og tey høvdu ikki riggað uttan.

Russiska S8000-Banderol verður vanliga rópt ”Frankenstein-missilið”, og Olena sigur, at tað er prógv fyri, at Russland ongar trupulleikar við at sleppa rundan um revsitiltøkini. Uppaftur álvarsamari er tað, sambært henni, at Russland við hesum kann kopiera vesturlendsku lutirnar.

Frankensteinmissilið ella S8000 Banderol inniheldur m.a. sporføriseindir úr USA, battarípakka úr japan, ein elektroniskan forsterkara úr Suðurkorea og tann mest kritiski luturin er mikrokontrollarin STM32 úr Schweiz. Hann er heilin í russiska missilinum, sum ikki hevði virkað uttan.

Tað er serliga ígjøgnum Kina, at lutirnir finna fram til Russlands, men eisini koma teir til Russlands ígjøgnum Turkaland og Kazakhstan.

Leggjast kann afturat, at tað er langt frá einans í Frankensteinmissilinum, at vesturlendskir komponentar eru at finna. Vesturlendsk framleiðsla er javnan at finna í russiskum vápnum.

Kelda og víðari lesnaður: https://ekstrabladet.dk/nyheder/krigogkatastrofer/russisk-frankenstein-missil-bygges-af-vestlige-komponenter/10885331