Byrjað varð á Skúlatrøð við vælkomu, felagssangi og eini minnisløtu fyri teimum 7, sum eru farin. Símun Petur Hjelm kunnaði um nýggja skúlan, sum fleiri vitjaðu fyri fyrstu ferð.  Nógv var at práta um afturvið einum drekkamunni og kaku. Til seinast var ein sangur sungin, sum varð yrktur til høvið, og felagsmyndir tiknar.

Síðani fóru øll niðan á Spinnaríið, har Heri Ellingsgaard og Ivan Isaksen fortaldu um húsið og verkætlanina.  

Dagurin endaði við veitslu við øllum, sum hoyrir til. 

Fleiri enn 100 næmingar í árgangi 1975

Í hesum árganginum, fødd í 1968, vóru 4 flokkar, sum byrjaðu í skúlanum við Ósánna. Harafturat vóru næmingar Norðan fyri fjall, í Haraldsundi og í Kalsoynni. Í alt vóru umleið 120 næmingar.

Frá fyrsta til fjórða flokk gingu øll við Ósánna. Í 1979, tá skúlin á Ziskatrøð gjørdist sjálvstøðugur, fluttu tríggir flokkar niðanum vegin í ovara skúla, meðan ein varð verandi í niðara skúla og býttur í tvey.

Í framhaldsdeildini komu næmingar av Viðareiði, úr Hvannasundi og Norðdepli í ein flokk afturat í ovara skúla.

Flokslærarar í 1. flokki vóru:
1 a: Johannes Johannesen
1 b: Elisa Waag
1 c: Betty Højgaard
1 d: Eyðfinnur Hansen