KÍ hevur nakrar ferðir havt seinna dystin í Klaksvík, men nakrar ferðir hava tapini á útivølli verið ov stór til at sigrar á heimavølli hava rokkið. KÍ er tvær ferðir komið víðari í Klaksvík. Móti Sutjeska úr Mintenegro í 2022 og móti SJK úr Finnlandi fyrr í summar.

Nú vitjar Radnicki 1923 úr Serbia, og tað er eitt lið, sum á pappírinum er væl betri enn SJK og serliga Sutjeska.

Og hóast Radnicki 1923 var greitt omaná í seinna hálvleiki í fyrra dystinum, so sigur søgan okkum, at tað er nakað heilt annað, ta KÍ spælir í Klaksvík. Greiningar og veddingarfyritøkur meta, at tað liggur á áleið 50/50 nú um, hvør fer at spæla seg víðari.

Á atgongumerki.fo hevur KÍ havt góða søla fyrstu dagarnar. KÍ hevur lækkað prísirnar aftanfyri málið, og tað eru framvegis hesi bíligastu plássini, sum fara síðst. Tað eru uttastu bólkarnir, har atgongumerkini kosta tað sama sum til landskappingardyst (100 kr.), har flest pláss eru eftir, meðan tað fyllist í hinum. Langsíðurnar blivu skjótt útseldar. Verður sølan síðstu dagarnar áleið sum hon plagar, so verður útselt hóskvøldið til hendan spennandi altjóða dystin, sum eisini verður tann síðsti í Klaksvík hjá nøkrum felag í ár óansæð úrslit.