Í kvøld spælir KÍ fyrsta landskappingardystin eftir summarsteðgin frá landskappingini.

Dysturin liggur millum tveir avgerandi dystir í 3. umfari í Conference League og júst hesir dystir eru nakrir, sum summi KÍ-viðhaldsfólk stúra fyri av royndum. Tí tað vísir seg ofta, sum vit serliga sóu í 2023, at hesir dystirnir eru nógv truplari enn undir vanligum umstøðum, tá altjóða dystir ikki hava verið frammanundan. Valið stendur millum at brúka troyttar leikarar ella leikarar sum ikki eru í dystarvenjing og ikki eru samanspældir. KÍ-venjarin skal taka eina avgerð um, hvussu nógvar útskiftingar skulu gerast. Sum ein sá móti Neman, so byrja fleiri leikarar at blíva tungir og við at spæla allar dystir økist vandin fyri skaðum nú ella seinni. Seinast vóru allir leikarar tøkir, men hesaferð verða helst onkrir, sum ikki verða í hópinum, tí teir skulu verða heilt klárir hóskvøldið í Ungarn. Hjá B68 var Jóhan Josephsen ikki við seinast vegna skaða.

Dysturin í Klaksvík byrjar kl. 18.00. Dómari verður Jákup Ø. Mohr.