Tað sá leingi út sum, at KÍ fór at koyra samlaða sigurin heim í Ungarn, men so skoraði Neman tvey mál og avgjørdi uppá brotssparkskapping.

Talan var annars fyrstu 80 minuttirnar um ein javnan dyst, har lítið hendi. Neman var kanska omaná og hevði bóltin nógv meira, men teir komu sjáldan til nakran góðan møguleika. KÍ hevði onkra góða roynd, men KÍ tóktist mangla yviraskotið til at hótta, tá Neman satsaði meir og meir. Gjøgnum dystin misti KÍ lyklaleikarar, sum plaga at spæla allar minuttirnar. Fyrst Odmar Færø í fyrra hálvleiki og síðani Hall Hansson og Páll A. Klettskarð í seinna hálvleiki. Helst viknaði tað um liðið. Eisini kann spurnartekin setast við, um KÍ brúkti rætta leikaravalið móti B68, tí leikarar hava brúk fyri hvíld bæði kropsliga og mentalt.

Í 80. minutti skoraði Neman eftir miseydnaða afturlegging og løtu seinni var 2-0, tá bólturin umvegis eitt KÍ-bein endaði í málinum. Tvey tilvildarlig mál, men tað var tað, sum mong eisini vístu á undan báðum dystunum, at Neman er eitt lið, sum kann skora nógv mál burturúr lítlum.

Í brotsskarkskappingini skoraðu allir hjá Neman, meðan eini KÍ-leikarin skeyt viðsíðuna av.

KÍ er sostatt úti av altjóða fótbólti í ár.