Bygdaleiðir eru almenn bussleið, sum skal gera tað lættari, betri og bíligari at ferðast runt landið. Ynskiligt er sjálvandi, at so nógv fólk sum gjørligt nýta hesar almennu farleiðir, tí hetta minkar um trýstið av vaksandi talinum av bilum á vegunum.

Prísbroytingar vórðu gjørdar í 2025, og hesar kunnu, sambært tingmanninum úr Javnaðarflokkinum, tykjast avbjóðandi. Tað kann til dømis undra, at ymiskir prísir eru ásettir, hóast vegastrekkini eru líka long.

Sum dømi nevnir Jóhannis Joensen, at vegalongdin úr Sandavági til Tórshavnar er 38,15 km pluss undirsjóvartunnil, og ferðaseðilin kostar 95 kr. Farleiðin úr Vestmanna til Tórshavnar er á leið líka long, 38,38 km, men ferðaseðilin kostar 55 kr.

Tað vil siga, at koyring ígjøgnum Vágatunnilin kostar hvørjum ferðandi 40 kr., hóast ein einvegis túrur við bussi sambært www.tunnil.fo kostar 25 kr.

Fyri at fáa greiði á hesum málinum, hevur Jóhannis sett hesar spurningar til landsstýrismannin í samferðslumálum, Jóhan Christiansen

1. Hvør er grundgevingin fyri, at prísir hjá Bygdaleiðum eru ymiskir, hóast vegalongdirnar eru tær somu?

2. Metir landsstýrismaðurin, at tílíkir prísmunir kunnu elva til minni nýtslu av Bygdaleiðum?

3. Eru ætlanir um at endurskoða og broyta prísskipanina við atliti at møguligum ójavnum?

4. Eru ætlanir um at skilja ímillum útlendingar og fastbúgvandi føroyingar, tá tað kemur til prísir við bygdaleiðum?