FSN hevur í mong ár tikið undir við tiltøkum, ið fremja trygd, trivna og menning í føroyska samfelagnum. Við hesi stuðulsavtalu verður eisini víst á, hvussu týdningarmikið tað er, at børn og ung hava góðar møguleikar, at luttaka í ítrótti – einum sunnum felagskapi – sum bæði styrkir kropsliga og sosialt.

RSF fegnast eisini um samstarvið, sum gevur feløgunum kring landið betri møguleikar at røkka fleiri ungum, bæði gjøgnum kappróðurin um summarið og inniróðurin í vetrarhálvuni. Hetta merkir, at rógvarar kunnu njóta eitt fjølbroytt og sunt ítróttarlív alt árið.

Formaðurin í RSF, Petur Hansen, fegnast um samstarvið og leggur dent á týdningin av góðum karmum fyri næstu ættarliðini:

– “Vit vilja fegin skapa eitt umhvørvi, har eisini børn og ung kunnu mennast í einum tryggum og sunnum felagsskapi. Við stuðlinum frá Føroya Skipara- og Navigatørfelag fáa vit betri møguleikar at styrkja feløgini kring landið, so fleiri ung kunnu fáa gleði av kappróðrinum – bæði á sjónum og í inniróðri alt árið.”

Við hesum stuðli verður ikki bert arbeitt fyri úrslitum í bátinum ella á maskinuni, men eisini fyri einum tryggum og sunnum felagsskapi, sum kann vera við til at menna børn og ung – bæði kropsliga og mentalt – til gagns hjá feløgunum í framtíðini og samfelagnum sum heild.