Men nevndin sigur samstundis, at hetta kann ikki fremjast uttan at danska stjórnin gevur sítt samtykki.

Hetta er ein greið staðfesting av, at altjóða rættarskipanin longu í dag gevur okkum møguleikar, tí WTO og onnur felagsskapir viðurkenna eindir sum Føroyar sum sjálvstøðug tolløki.

Hetta merkir, at hóast vit hava altjóða rættarligan møguleika, so er tað grundlógin í Danmark, ið forðar okkum. Hetta er ikki nakað framstig, tað er tvørturímóti ein týðilig áminning um, at vit eru bundin í eini spennitroyggju, har vit bert kunnu flyta okkum, tá danska stjórnin vil loyva tí.

Hetta er ikki ein sigur fyri Føroyar, men heldur eitt ítøkilig prógv um, hvussu heimastýrið avmarkar okkara møguleikar.

Tað verður staðfest svart uppá hvítt, at so leingi vit eru partur av Danmark, kunnu vit ikki gera altjóða avtalur, og kunnu ikki gerast limir í teimum felagsskapum, sum beinleiðis viðvíkja okkara egnu áhugamálum, uttan at fáa danska góðkenning.

Hetta er ein støða, sum vit síggja aftur og aftur:
-          Hetta er galdandi í felagsskapum innan fiskivinnu, har vit bert sleppa inn, um Danmark vil.
-          Tað sama galdandi fyri okkara ítróttarfólk
-          Og nú eisini fyri WTO, sum beinleiðis snýr seg um at tryggja okkara handilspolitiska sjálvræði.

Avgerðin hjá § 6 heimastýrisnevndini staðfestur, at bert við donskum samtykki kunnu vit gerast WTO-limur.

Hetta er sjálv kjarnan í heimastýristrætuni: vit hava rættindi, men bara tá Danmark gevur okkum tey í hendi.

Tí eiga allir føroyingar at seta sær spurningin:

Skulu vit góðtaka at vera bundin av einum donskum veto, tá møguleikarnir liggja víðopnir í altjóða samfelagnum til at virka sjálvstøðugt?

Svarið er sjálvsagt: LOYSING krevst, skal nakað broytast.

Tað er einans við fullum sjálvsavgerðarrætti, at vit kunnu brúka okkara rættindini og møguleikar, sum altjóða skipanin gevur okkum. Tað er einans við fullum sjálvsavgerðarrætti, at vit veruliga kunnu gerast kappingarfør í mun til Ísland, Noreg og Bretland, og einans við fullum sjálvsavgerðarrætti at vit veruliga kunnu gerast WTO-limur uttan góðkenning úr Danmark.

Hetta er kjarnin í avgerðini, og kjarnin í stríðnum fyri eitt frælst Føroyar.

Við framburðs- og tjóðskaparkvøðu
Øssur Patursson