Niðanfyri er talva, sum vísir hagtøl á Kalsoyarleiðini fyri ferðafólk og bilar sjóvegis og ferðandi í bussleiðini hjá Strandferðsluni.

Har sæst, at talið av ferðandi sjóvegis 2025 helt sær í mun til 2024 fram til juni, men minkaði fyri juli og august. Uttan iva er arbeiðið ísamband við breiðking av ferjuleguni á Syðradali ein orsøk til hetta.

Talið av bilum sjóvegis er minkað nógv. Uttan iva tí, at meðan arbeiðið á ferjuleguni fór fram, kundu bilar vanliga ikki førast til Kalsoynna.

Hinvegin er talið av ferðandi við bussi nógv hækkað av somu orsøk, tí  bilar vóru ikki førdir til oynna, meðan arbeiðið uppá ferjuleguna fór fram. Og her tosa vit bara um teir bláu bussarnar hjá Bygdaleiðum.

Samanbera vit talið av ferðandi sjóvegis  við talið av ferðandi í bussleiðini, so vísir hetta, at fleiri enn annaðhvørt ferðafólk sjóvegis brúkti bussleiðina - og ta gongdina eigur ein at halda uppá og arbeiða fyri: Betri bussleið millum bygdir og ferju fyri at minka um bilatalið og harvið hækka um trygdina á smalu vegunum og trongu bergholunum.

virðingarmest
Visit Kalsoy