Veðrið um vikuskiftið
Eitt sindur av vindi í dag, í nátt og fyrrapartin í morgin. Eftir tað fer hann at minka niður í eitt lítið lot. Eitt brúgvalag stendur og hóttir vestanfyri, og tað hevur hug at reka inn yvir vestaru oyggjarnar. Tað fer tað at gera onkra løtu í kvøld og í morgin. Eitt sindur óvist hvussu langt eystureftir tað fer at røkka.
Eitt máttmikið hátrýst stendur eystanfyri og heldur lágtrýstini burtur. Tey royna at leypa á, men mótið er júst um okkara leiðir.
Men nóg mikið um tað á hesum sinni, og vit fara beint til veðrið um vikuskiftið:
Nú á middegi er strúkur í vindi upp í skrið sunnaneftir, 13 til 18 m/s, høgt skýloft, onkur sólglotti og yvirhøvur turt. Tá líður á seinnapartin er samdrigið. Í kvøld frískur vindur upp í hvassan vind sunnan, 10 til 15 m/s, enn samdrigið men ælaveður ella regn í vestara partinum av landinum. Hitin 10 til 13 stig.
Í morgin er frískur vindur upp í strúk av landsynningi, 8 til 13 m/s, samdrigið og regn, fyrst vestanfyri. Seinnapartin støkkur hann vesturum og fer í útsynning, vindurin minkar niður um 5 m/s, loftið hálvskýggjað og sólglottar, men eisini regn í støðum. Um kvøldið slítur í. Um náttina lítið lot av útsynningi, minni enn 5 m/s, hálvskýggjað og yvirhøvur turt. Hitin 11 til 13 stig, men um náttina niður í 5 stig.
Sunnumorgunin er eitt lítið lot av landnyrðingi, minni enn 5 m/s, skiftandi skýloft og okkurt ælið. Seinnapartin lot til frískt lot av landnyrðingi, 3 til 8 m/s, skýggjað og ælaveður. Um kvøldið lot til frískt lot norðan, 3 til 8 m/s, skýggjað og okkurt ælið. Um náttina lítið lot av útnyrðingi, minni enn 5 m/s. Hitin 8 til 11 stig.
Gott vikuskifti.