Andreas Wilhelm Skibsted, danskur vinnulívsmaður og konsul, átti jaktina.

Tá ið Føroyar í 1856 fingu fríhandil, keypti Skibsted burtur av ognum einahandilsins, Bakkapakkhúsið og Munkastovuna, í Tinganesi og læt upp handil við úthandlum. Í Álakeri reisti hann pakkhús, konslarapakkhúsið, við atløgubrúgv og krana at lossa og ferma skipini.

Nr. X sigldi við farmi millum meginhandilin í Havn og úthandlar á bygd. Christian Djurhuus, Kristjan í Ólavsstovu, førdi konslarajaktina í mong ár. Aftan á hann hevði Eliesar Rubeksen, Essa hjá Rubekki, hana.

Áðrenn fríhandilin var veruleiki, hevði Skibsted skip á hákellingaveiði undir Føroyum og læt byggja hús í Álakeri til lýsibræðingar og goymslu. Tá ið stórgrindir løgdu beinini, keypti hann nógvar kúlur.

P.C. Johannesen, Petur í Mattalág, í Havn keypti jaktina, legði hana fyri teym á Skálafjørðinum, og har sakk hon ein dagin. Í 1911 lýsti hann seglini til sølu í Dimmalætting.