Roykjarar skulu minka um hallið hjá samgonguni
Eisini fíggjarlógaruppskotið fyri 2026 vísir stórt hall. Í fyrstu atløgu skal tað almenna brúka 173 milliónir meira, enn hvat kemur inn. Men hetta undirskotið verður ikki tað endaliga, sigur Ruth Vang, tí ætlanin er eisini at innføra býlisstuðul seinni, og fer hetta at vaksa um útreiðslurnar. Millum átøkini, sum skulu minka um hallið, er at hækka kostnaðin á snúsi og sigarettum. Hetta verður at síggja til gjørt fyri at avtaka MVG av blæum, grønmeti og eplum.
Ætlanin er at hækkka kostnaðin á snúsi við 20 krónum fyri dósina, og at gera sigarettir 6 krónur dýrari pr. pakka.
Meðan tað gerst dýrari at nýta tubbaksvørur, gerst tað bíligari hjá barnafamiljum, serliga um tær hava heilt smá børn og eta grønmeti. Í framløguni hjá Ruth Vang var eitt dømi við eini barnafamilju, har tað eru 3 børn í aldrunum 1, 5 og 8 ár. Tann familjan skal í 2026 hava 7.000 kr. meira at liva fyri, tí blæur, epli og grønmeti gerast bíligari, eins og at barnafrádrátturin hækkar við 4.000 kr./ár fyri hesi trý børnini (1.500 fyri børn 0-6 ár og 1.000 fyri børn 7-17 ár). Lesandi fáa eisini 1.000 kr. meira um mánaðin.
Samanumtikið tykist fíggjarlógaruppskotið ikki at vera so ambitiøst, sum mong høvdu vónað. Allir bati bøtir, men tey, sum høvdu væntað MVG-frítøku av gerandisvørur so sum t.d. mjólk ella frukt, verða skuffað.