Klaksvíkingurin stórtrívist í landsliðsvenjarasessinum og hevur fingið eina so góða byrjan í úrslitum sum eingin annar landsliðsvenjari.

Tilsamans hevur Eyðun Klakstein verið landsliðsvenjari í níggju kappingardystum (umframt einum venjingardysti). Føroyar hava vunnið fimm av hesum dystum. Móti Armenia, Gibraltar (2), Montenegro og Kekkia.

Hóast Eyðun bara hevur níggju kappingardystir, so telist hann longu millum teir við flest sigrum. Tí bara Allan Simonsen, Lars Olsen og Håkan Ericson hava vunnið fleiri kappingardystir. Og telja vit bara HM- og EM-undankappingardystir, sum kanska gevur best grundarlag til samanbering, tí so fáir landsliðsvenjarar hava havt Nations League, har mótstøðan er veikari, so eru bara Allan Simonsen og Lars Olsen frammanfyri og teir eru bara ein og tveir sigrar frammanfyri.

Skulu vit samanbera byrjanina hjá landsliðsvenjarunum, so skarar Eyðun framúr.

Dystir fyri at røkka fimm sigrum í kappingardystum:

9: Eyðun Klakstein

19: Håkan Ericson

31: Lars Olsen

33: Allan Simonsen

Dystir fyri at røkka fýra sigrum í HM- og EM-undankappingarsigrum:

7: Eyðun Klakstein

17: Allan Simonsen

28: Lars Olsen