Sølan av atgongumerkjum til steypafinaluna hjá monnum er byrjað, og fer fram í nethandilinum á heimasíðuni hjá FSF

Fríggjadagin 31. oktobur klokkan 19:00 verður Tórsvøllur karmur um enn eina finalu um Løgmanssteypið. Liðini, ið bresta saman í ár, eru KÍ og Víkingur.

Seinast, hesi bæði møttust í steypafinaluni, var fyri trimum árum síðani, tá teir ljósabláu vunnu 1-0. Einsamalla málið í dystinum skoraði Sølvi Vatnhamar við brotssparki tríggjar minuttir fyri leiklok.

Hvussu verður í ár, nú vit skriva 2025, verða vit klókari upp á fríggjakvøldið í næstu viku.

Atgongumerkjasølan til ársins steypafinalu er byrjað, og fer fram í nethandilinum á FSF.fo og á atgongumerki.fo.

Kostnaðurin er 100 krónur fyri vaksin, meðan tað er ókeypis atgongd fyri børn, 14 ár og yngri. Tó skal viðmerkjast, at hóast atgongumerki til børn er ókeypis, skulu hesi skrásetast í nethandilinum, og vísast við dyrnar.