At KÍ vann løgmanssteypið skyldaðist m.a. tveimum sera avgerandi málum, sum Dávid B. Andreasen átti ein stóran leiklut í.

Í fyrsta umfarinum var støðan 1-1 millum HB-KÍ, har KÍ hevði ein leikara útvístan. Tað sá út til at fara í longda leiktíð, har HB hevði staðið við bestu kortunum. Men m.a. innskifti Dávid B. Andreasen vildi tað øðrvísi. Hann slapp leysur í høgru síðu og legði væl innfyri til Páll A. Klettskarð, sum avgjørdi til 2-1. Í fjórðingsfinaluni stóð enn meir á hjá KÍ. Tá førdi B36 1-0 fram til klokkan hevði rundað 92 minuttir. Tá javnaði Dávid við flottum langskoti. KÍ vann brotssparskappingina og í hálvfinalunum hevði KÍ lutakasthepni og trekti AB úr næstbestu deildini, har alt bleiv avgjørt fyrra dystin í Klaksvík, sum KÍ vann 4-0.

Hjá KÍ var tað sostatt í dystunum móti HB og B36, at mest stóð á og í báðum førum var tað Dávid, sum fekk ein høvuðsleioklut í avgerandi málum.

Dávid er givin á besta liðnum hjá KÍ vegna manglandi dystarminuttir á besta og næstbesta liðnum og fer í komandi viku at royndarvenja við Levanger, sum spælir í triðbestu norsku deildini