– Kórið, sum Símun Nónklett setti á stovn í 1969, kom longu í 1972 út við plátuni “Kirkjutónar” og árið eftir við enn eini plátu, “Í adventini”. Tí hildu vit tað vera hóskandi at koma við triðju útgávuni, nú kórið hevur væl meira enn hálvthundrað ár á baki og framvegis er virkið.

Tað sigur kórleiðarin Meinhard Bjartalíð, ið sjálvur hevur stjórnað kórinum til upptøkurnar og staðið fyri framleiðsluni.

– Hugskotið við útgávuni er at skjalfesta kórið, sum tað ljóðar nú, og eg hugsi, at útgávan leggur seg snøggliga í framhaldi av søguni hjá kórinum. Heitið á útgávuni er “Nú hitar sólin bjarta”, ið eisini sæst aftur á kápumyndini av kórinum uttan fyri Glyvra kirkju eitt gott summarkvøld, sigur hann.

– Kórið, sum á útgávuni telur 25 sangarar, hevur bæði sungið “a capella” og við orgulfylgispæli, har Jensina Simonsen hevur sitið við tangentarnar. Vit valdu at gera upptøkurnar í Rituvíkar kirkju, tí har eru av allarbestu ljóðviðurskiftum.

Útgávan løgd fram

Í sambandi við útgávuna verður ein markering í Glyvra kirkju mortansaftan, sum er mánakvøldið 10. novembur, klokkan 19, har kórið fer at syngja okkurt av tí, sum er við á útgávuni, og aftaná verður ein drekkamunnur og lítil hugnaløta.

Tað er plátufelagið Tutl, sum gevur plátu og fløgu út. Pauli Magnussen hevur gjørt upptøkurnar og Uni Debess hevur mastrað. Myndirnar hevur Amy Hansen tikið, Grafia hevur sniðgivið og Estra prentað bæði plátu- og fløguhúsa.

– Eg haldi, at útgávan er væl eydnað og allir partar hava gjørt sítt besta til, at so skuldi vera. Nú mánakvøldið verður útgávan so løgd fram, so vit eru sum vera man spent eftir at síggja, hvussu móttøkan verður, sigur Meinhard Bjartalíð at enda.