Meiriluti í Uttanlandsnevndini fyri revsiheimild móti Russlandi
Uttanlandsnevndin hevur skrivað álit í málinum um at geva Landsstýrinum heimild at seta revsitiltøk í verk ímóti Russlandi. Nevndin hevur skipað seg í ein meiriluta og tríggjar minnilutar, og meirilutin mælir til at geva Landsstýrinum heimildina, tó soleiðis, at hon ikki verður latin fyrrenn 1. januar 2026, tá verandi fiskiveiðiavtala er farin úr gildi.
Meirilutin, sum er Bjarni Hammer (C), Høgni Hoydal (E), Annika Olsen (E) og Karlot Hergeirsson (F), t.e. samgonguumboðini í nevndini, skriva, at av tí at galdandi fiskiveiðiavtala gongur fram til árslok, verður gildiskoman broytt til 1. januar 2026, tí so ”ger uppskotið ikki inntriv í longu inngingnar avtalur”. Meirilutin vil hartil treyta sær, at Landsstýrið ráðførir seg við Uttanlandsnevndina, áðrenn sanktiónirnar verða settar í verk.
Eisini Jenis av Rana (H) tekur undir við at lata Landsstýrinum revsiheimildina, men hann hevur aðrar viðmerkingar og er tí ikki við í meirilutatilmælinum.
Bárður á Steig Nielsen (B) og Jacob Vestergaard (A) mæla frá at lata heimildina. Bárður á Steig Nielsen skrivar m.a., at ”ongi prógv eru fyri hesum illgruna” um, at reiðaríini hava borið seg skeivt at. Tað sama sigur Jacob Vestergaard, og leggur afturat, at Føroyar við hesum missa nýggju framkomnu verksmiðjutrolararnar (fyri uml. 1,5 mia.) og alla ta vitan, sum er bygd upp øll hesi ár, og at allar tær familjur, hvørs grundarlag er bygt á inntøkur frá fiskiskapi í Barentshavinum, missa sítt tilverugrundarlag, sum hann orðar tað.
Alt álitið kann lesast á https://www.logting.fo/mal/mal/?id=11218 og við at velja ”Álit” úti í høgra bredda.