Lágtrýstið, sum er motorurin aftan fyri alt hetta, er langt vekk. Tað liggur yvir Botnisku víkini og fær kalda luft at reka av leiðini við Norðurgrønland allan vegin til okkara og suðurum. Hósdagin kemur órógv í mynstrið, og so fara lágtrýst at ganga norðureftir ímillum Grønland og Ísland. Tá fer nakað væl lýggjari og slavnari luft at reka ímóti okkum sunnaneftir.  

Veðrið í vikuni – dag fyri dag:

Mánadagin:

Fyrrapartin minkandi vindur av útnyrðingi úr einum loti til frískt lot, 3 til 8 m/s, niður í eitt lítið lot, minni enn 5 m/s, skýggjað og yvirhøvur turt. Tá líður á seinnapartin hækkar hann upp í norðan, og tað verður okkurt kavaælið norðanfyri. Um náttina frísdkur vindur upp í strúk norðan, 8 til 13 m/s, samdrigið og kavi. Hitin úr 1 stigi undir frostmarkinum upp í 4 stig. 

Týsdagin:

Frískur vindur upp í hvassan vind, 10 til 15 m/s, skýggjað og kavi ella kavaæl. Hitin úr 2 stigum undir frostmarkinum upp í 3 stig oman fyri frostmarkið.

Mikudagin:

Frískur vindur upp í hvassan vind norðan, 10 til 15 m/s, smdrigið og kavi. Um kvøldið og náttina minkandi niður í lot til frískt lot, 3 til 8 m/s, hálvskýggjað og sum frá líður slítur í. Hitin millum 2 kuldastig og 3 hitastig.

Hósdagin:

Lot til frískt lot norðan, 3 til 8 m/s, hálvskýggjað og turt. Fyrrapartin gongur hann vesturum og niður í útsynning, og sum frá líður hann hann at veksa vindin upp í frískan vind upp í hvassan vind, 10 til 15 m/s, tað dregur á luftina, og um kvøldið fer at regna. Hitin um dagin millum 2 kuldastig og 3 hitastig; um kvøldið náttina upp í 7 stig.

Fríggjadagin:

Frískt lot til frískan vind av útsynningi, 5 til 10 m/s, skiftandi skýloft og regn ella ælaveður. Hitin 4 til 9 stig.