Vit samtyktu eisini tvær mió. kr. til at breiðka Froðbiarvegin, og ein mió. til gongubreyt í Trongisvági. Hesar verkætlanir høvdu til endamáls at bøta um ferðslutrygdina á hesum vegastrekkjum.

Nú fýra ár seinni kunnu suðuroyingar staðfesta, at Landsverk einans er byrjað upp á Froðbiarvegin av hesum arbeiðum. Froðbiarvegurin varð breiðkaður í vár, men vegurin er enn ikki asfalteraður. Tað hevur viðført, at bilar við jøvnum millumbilum fáa skaða av manglandi asfaltering. Hinar vegagerðirnar eru ikki eingongd byrjaði.

Almenna umrøðan í vikuni hevur víst, at Landsverk av sínum eintingum eru farin ímóti løgtingsins vilja, og hevur stovnurin brúkt peningin í heimildarloysi til heilt aðrar verkætlanir norðanfyri.

Tað er sjálvandi ikki í lagi. Vit vita øll, at tá løgtingið viðgerð fíggjarlógina, so verða semjur gjørdar millum flokkar, ofta tvørtur um samgongu og andstøðu, fyri at fáa semju um fíggjarlógina, sum er sjálvt grundarlagið fyri øllum politikkinum í einum samfelag.

Vegurin úr Hvalbiartunlinum, vegurin í Froðba og gongubreytin í Trongisvági/Líðini vóru partur av semjuni um og grundarlagið undir fíggjarlógina fyri 2022.

Ein stovnur kann ikki av sínum eintingum tileinkisgera eina politiska semju, sum er ásett í lóg.

Fyri at fáa greiðu á hesum máli havi eg sett landsstýrismanninum í samferðslumálum, Jóhan Christiansen, hesar spurningar. 

• Hví er einki gjørt við vegaføringin úr Hvalbiartunlinum í Trongisvág, hóast játtan varð oyramerkt til endamálið á fíggjarlógini fyri 2022?
• Hví er einki gjørt við gongubreytina í Trongisvági/Líðini, hóast játtan varð oyramerkt til endamálið á fíggjarlógini fyri 2022?
• Nær verður Froðbiarvegurin gjørdur ferdigur.
• Hvørja heimildir hevur Landsverk at raðfesta aðra vegagerð enn tað, sum er ásett við lóg?
   

Bjarni Hammer, løgtingsmaður fyri Javnaðarflokkin