Men hvør er Nigel, sum sjómanstrúboðarin hitti umborð á Pison, tá hann mikudagin var umborð við jólapakkum?

-Eg eri føddur í Nýsælandi og havi búð har størsta partin av lívinum. Mær hevur dáma væl at siglt, og tí havi eg verið sjómaður meginpartin av vaksna lívinum.

-Í 2006 sigldi eg við skipi frá suður Nýsælandi, sum var selt til Føroyar. Eg helt tað var spennandi av fylgja við skipinum, og tí kom eg til Føroyar tá. Skipið fekk navnið Riba. Tað steðgaði bara umleið eitt ár í Føroyum, áðrenn tað var selt til Grønlands og fekk navnið Aja Aaju, sigur hann.

-Eg fylgdi við til Grønlands og sigldi við Aja Aaju, sum skipið kom at kallast, í tvey ár. Síðani fór eg við trolaranum Haki.

Tá Haki var seldur keyptu teir Ilivileq, sum seinni var seldur til Íslands. Eg fylgdi við til Íslands og sigldi við har í 10 ár. Tá Iliveleq var seldur til Ruslands, sigldi eg við øðrum íslendskum trolara, til hann var seldur í 2022, sigur Nigel.

-Tá ringdi eg til Eyðstein Sørensen, sum í fleiri ár var skipari á Aja Aaju. Hann bjóðaði mær hýru við Pison, sum hann førdi, og eg tók av. Her havi eg trivist væl, sigur hann.

-Eg havi Nýsælendskt pass, og føroyskt visum, sum er tengt at, at eg havi arbeiði her. Eg havi siglt saman við monnum úr ymiskum londum, men eg haldi, at tað er lætt og gott at sigla saman við føroyingum, sigur Nigel.

Hóast Nigel hevur fylt 70 ár, so dámar honum væl at sigla. Hann vónar at heilsan verður góð, so hann kann sigla eina tíð afturat.

Honum, teimum umborð á Pison og sjófólkið annars verður ynskt Guds signing og varðveitslu.