Hesa ferð hevur Rættarnevndin, ið hevur havt málið til viðgerðar, býtt seg sundur í tríggjar minnilutar; tveir líka stórar og so ein triðja við bert einum tingmanni, ið er Henrik Old. Henrik Old vísir á, at vit eiga at vísa solidaritet mótvegis mammum og óføddum børnum, og á, at Barsilsgrunnurin bólgnar, og at upplagt tí er at brúka burtur av pengunum har til fyrstuferðarføðandi.

Ein av teimum, ið nevndin hevur havt inni at fundast við, er Føroya biskupur, Jógvan Fríðriksson, og hann førdi fram, at ”Tøka av lívi samsvarar ikki við grundarlagið undir mínari kristnu trúgv. Vit hava  fingið  eina  uppgávu  við  atliti  at  lívinum,  ið  vit  mega  røkja  við  nærlagni  teimum  livandi  at frama”. Henrik Old sigur seg vera samdan við bispi í, at føroyingar eiga at siga Ja til lívið, og at lívið krevur solidaritet, sum hann orðar tað.

9 ciffur í Barsilsgrunninum

Henrik Old vísir á, at tann 1. september 2025 kom innistandandi í Barsilsgrunninum upp um 100 milliónir, og tað er ein øking upp á 15 milliónir bara síðani árslok 2024. Sostatt streymar peningur munandi skjótari inn í grunnin enn út úr honum, og Henrik Old endar sína átekning á álitið við at siga, at hann fer at skjóta upp at brúka pening úr grunninum at geva teimum, ið eiga barn fyri fyrstu ferð, eina munandi eingangsupphædd.

Fosturtøkumálið er mál nr. 8 á tingfundinum týsdagin, ið byrjar kl. 11.