Kirkjugarðurin er frá 1782 og er grundlagdur av danska prestinum Rasmus Jørgen Winther. Her eru einar 240 gravir við gravsteini við á leið 500 nøvnum.

Serliga tvær lagnur verða umrøddar. Onnur er frásøgn hjá Caroline Heinesen, mammu William, um Havnina og havnarfólk, sum hon minnist tey, í egnum endurminningum frá 1930’unum.

Hin er um ættina hjá Faktorinum í Klaksvík, Johan Christian Djurhuus, sum sjálvur fimti í ættini er jarðaður í Gamla kirkjugarði. Serliga áhugaverd er dagbókin hjá deyðasjúka abbasoninum, Egil Henning, sum doyði bert 20 ára gamal í 1919. Hann lýsir sera væl lívið og fólk í Havn.

Seinast í bókini er yvirlit yvir allar greinarnar í røðini “Hendur ið sleptu”, sum Óli Jacobsen skrivaði í Sosialinum árini 2007 til 2013. Í yvirlitinum sæst, hvørjir persónar í Gamla kirkjugarði eru umrøddir í hvørji grein. Eisini er ávísing til, hvussu finnast kann fram til hesar frásagnir á teldu.

Bókin verður løgd fram í Rit og Rák leygardagin tann 29. november kl. 14. Hon kostar kr. 250 í bókhandlunum.