”Eitt søguligt politiskt lágmark” og ”valdsmisnýtsla”, varð sagt tá
Í gjár segði eitt landsstýrisfólk sessin frá sær til tess at kunna atkvøða í einum máli á Løgtingi. Hetta sama hendi í desember í 2021, tá Elsebeth M. Gunnleygsdóttur og Jacob Vestergaard søgdu landsstýrissessarnar frá sær fyri at atkvøða í einum máli um sammøður, ið tá var fyri. Tá rópti formaðurin í Tjóðveldi hesa manøvruna fyri ”eitt søguligt politiskt lágmark” og ”valdsmisnýtslu”.
Í summum londum er tað so, at ministarar varðveita atkvøðurættin í parlamentinum, hóast teir sita sum ministarar. Soleiðis er ikki í Føroyum. Ert tú innvalt tingfólk, men síðani útnevnd/ur til landsstýrisfólk og hevur hug at atkvøða í einum máli, sum Løgtingið viðger, so er einasti hátturin til at kunna tað at siga landsstýrissessin frá tær.
Hetta sóu vit henda í málinum um sammøður, ið var fyri í desember í 2021. Landsstýrisfólkini Jacob Vestergaard og Elsebeth Mercedis Gunnleysdóttur ynsktu at atkvøða í tí málinum og søgdu tí landsstýrissessirnar frá sær. Men tá hendi tað, at formaðurin í Tjóðveldi, sum tá sat í andstøðu, segði seg vera ”skelkaðan av framferðini”, at tað var ”eitt søguligt politiskt lágmark” og ”valdsmisnýtsla”.
Í gjár nýtti eitt landsstýrisfólk hjá Javnaðarflokkinum, Súsanna Bertholdsen, sama framferðarhátt. Spurningurin er tí, um hon harvið tangeraði lágmarkið hjá Elsebeth og Jacob – ella um hetta er enn eitt dømi um, at man brúkar ein heilt annan mátistokk fyri lágmarki, tá man situr í samgongu, enn tá man situr í andstøðu.
Kelda til reaktiónina hjá táverandi tjóðveldisformanninum er at finna her:
https://kvf.fo/netvarp/uv/2021/12/20/hgni-hoydal-eitt-sguligt-politiskt-lgmark