Maria Zakharova, ið tosar fyri Sergei Lavrov og russiska Uttanríkisráðið, sigur, at stigið hjá Føroyum er alt annað enn vinarligt og fær tey at seta spurningarnar við Føroyar sum álítandi samstarvspart. Hon sipar til, at Løgtingið týsdagin samtykti at geva Sirið Stenberg heimild til at burturvísa skipum hjá reiðaríunum Norebu og Murman Seafood úr føroyskum sjóøki.

Hon vísir eisini á, at Russland annars var sinnað at halda fram við ”konstruktivu bondunum” á fiskivinnuøkinum. Tað er orsøkin til, at Russland higartil ikki hevur sett móttiltøk í verk sum svar uppá tiltøkini, sum longu eru sett í verk, herundir havnarstongsulin. Tá heitti russiska fiskaríagenturið Rosrybolovstvo á russisku stjórnina um at seta bann fyri innflutningi av føroyskum fiskavørum. Men russiska stjórnin gjørdi tað ikki vegna atlit til samstarvið í Fiskiveiðiavtaluni. Júst tí russisku skipini, ið eru umfatað av Fiskiveiðiavtaluni, vóru undantikin sanktiónunum.

At tað nú er Føroya Løgting, sum ikki tekur fyrilit fyri Fiskiveiðiavtaluni, við tað at heimild 2. desember varð latin Landsstýrinum at tveita skip, sum í dag eru umfatað av avtaluni, úr føroyskum øki, ger, at Russland nú sær tað sum sín rætt at svara aftur við móttiltøkum ímóti Føroyum. Maria Zakharova sigur tó eisini, at móttiltøkini bert verða sett í verk, um Landsstýrið ger nýtslu av heimildini frá Løgtinginum. So nú liggur alt í hondunum á Sirið Stenberg ...

Keldur: https://www.rbc.ru/politics/04/12/2025/69316f389a7947cb3d18f04f og

https://www.rbc.ru/politics/04/12/2025/69316f389a7947cb3d18f04f.