Dópsnavn hansara var Poul Poulsen. Seinni setti hann Nolsøe eftir føðioynni aftur at navninum. Í kirkjubókini stendur ikki, nær Nólsoyar Páll var føddur, men doyptur 11. oktober 1766. Tá var siður at doypa børn minni enn viku eftir, at tey vóru fødd.

Nólsoyar Páll vaks upp í eini tíð, tá ið Rybergs handil í Vágsbotni hevið latið dyrnar út í heim á glopp. Úr Nólsoy eygleiddi Páll skip, ið komu og fóru av Havnini, og útlongsul hevur helst tíðliga gjørt vart við seg.

Poul Johannesen Nolsøe, bróðursonur Nólsoyar Páls, mintist væl Páll og sigur eitt nú soleiðis í greinini ”Um Nólsoyar Páll og ætt hansara” (í Varðanum, 16. bindi):

”Eg minnist Nólsoyar Páll, farbróður, dansa her. Hann var vakur maður, rankari enn hinir brøðurnir, væl dæmdur og hevði jarpt hár. Seinastu ferð hann dansaði her, minnist eg, hann kvað Fruntatáttin; tá var hann í bláari troyggju við reyðum knappholum og reyðum knøppum undir knøunum, bláum hosum og spenniskóm. Hann hevði vakurt klingandi mál – tá gekk dansur!”