Jobmatch hevur veruliga vunnið sær sess sum afturvendandi starvstevna millum jóla og nýggjárs, og undirtøkan er vaksandi á hvørjum ári.

“Tilmeldingin í ár hevur gingið við rúkandi ferð, og varð mest sum fullsett longu í oktober mánaði. Hetta hóast vit nú eru flutt niðan í flottu og rúmligu Stórhøllina við Tjarnir, og tískil eisini hava fingið pláss fyri fleiri luttakarum. Tað, at hava allar luttakararnar samlaðar í einum stórum høli, vænti eg, fer at geva starvstevnuni eitt enn betur ‘flow’, ið fer at gagnast bæði luttakarum og vitjandi.” sigur Katrin I. Gregersen, samskipari av Jobmatch.

JobPrát skipanin er opnað, og hava vitjandi longu nú bílagt sær jobprát. Til ber at gera hetta  umvegis heimasíðuna jobmatch.fo fram til mánadagin 29. desember kl. 12. Men best er at bíleggja í góðari tíð.

“Tað er eitt sera breitt úrvæl av arbeiðsgevarum frá bæði tí privata, kommunala og almenna geiranum, innan framleiðslu, handverk, tænastu, gransking og fyrisiting.  Á heimasíðuni jobmatch.fo ber til at kunna seg um einstøku fyritøkuna ella stovnin” sigur Katrin.

Jobmatch starvstevnan verður týsdagin 30. desember í Stórhøllini við Tjarnir. Tiltakið er ókeypis fyri vitjandi.

Jobmatch verður stuðla av Tórshavnar kommunu, Bakkafrost, Articon og Sansir