29 ára gamli Jóannes Bjartalíð hevur síðstu trý árini spælt við norska felagnum Fredrikstad, men har heldur hann ikki fram. Hann hevur verið darvaður av skaðum í 2024 og fyrra part av 2025, men síðani í summar hevur hann verið frískur.

Tað hevur ligið í kortunum leingi, at tað verður ikki føroyskur fótbóltur hesaferð, og tað kann hann vátta enn einaferð.

- Tað er stórur áhugi og okkurt konkret tilboð liggur á borðinum. Enn er einki avgjørt, men eg vóni, at alt er komið uppá pláss áðrenn 1. januar, sigur Jóannes Bjartalíð við Norðlýsið.

Leysasøgur hava verið um, at sannlíkt er, at Jóannes fer at royna eydnuna langt burtur, har føroyingar ikki hava siðvenju at spæla. Har eru lond sum Thailand, Vietnam og Aserbadjan nevnd. Jóannes vil ikki viðmerkja nøkur lond, men sigur, at tað í løtuni er sannlíkt, at tað verður í onkrum landi, sum liggur langt frá Skandinavia og kanska í øðrum heimsparti enn Evropa.