Lagt verður upp til eina av stóru løtunum í føroyska festivalsummarinum, tá ið tiltikni gentubólkurin Faroe5 spælir á Summar Festivalinum í august 2026.

Tey flestu munnu kenna hittini – "Bara Eitt Spæl", "Tú Fert Altíð At Vera Har", "Eg Vil Hava T" og fleiri – og hóast 15 ár eru liðin, síðani bólkurin seinast spældi í Føroyum, liva sangirnir framvegis væl.

Tað var staðfest, tá ið Faroe5 hevði framførslu á sonevndu Lestrargonguni í Keypmannahavn í ár. Tá mundi felagssangurin og fagnaðurin ongan enda fingið. Og nú er tíðin komin, at Faroe5 aftur fara at spæla í Føroyum.

Faroe5 kom við fyrsta sanginum í 2008, og "Bara eitt spæl" var stórt summarhitt hetta árið. Tá ið fyrsta heildarútgávan kom út sama summar, hevði hon fleiri hitt við sær, og Faroe5 var frá fyrsta tóna ein risastór suksé.

Í 2009 spældi Faroe5 á fleri summartiltøkum – eitt nú høvdu tær framførslu á stóra palli á Summar Festivalinum – men nakað seinni fór bólkurin í dvala. Sangirnir hava tó livað sítt egna lív, og nú eru tær í Faroe5 aftur til reiðar at spæla stóra festivalkonsert.

Nú sum tá eru songkvinnurnar í Faroe5 Lillian Dalsgaard, Asta Højgaard, Jónvá Ellingsgaard, Ragnhild Dam og Vígdis Fjallstein Christiansen.

Summar Festivalurin verður hildin í døgunum 6. til 8. august 2026.