Smá lond eru bundin av, at altjóða spælireglurnar verða hildnar, eins og altjóða lóg, men tá stórveldini spæla við musklunum, sum Russland hevur gjørt, og sum USA eisini gjørdi í dag, so er vandi fyri, at regluverkið dettur niðurfyri, og tá fáa smáu londini trupult við at verja seg. Hetta sigur professarin Hans Andrias Sølvará við Kringvarpið, ið hevði samrøðu við hann í sambandi við, at USA hevur lopið á Venezuela.

Hans Andrias Sølvará undirstrikar, at tað sum forsetin í Venezuela hevur gjørt, ikki eigur at verjast; hann hevur verið ein rættiliga illa umtóktur forseti. Men reglan hevur verið, at stórveldini ikki blanda seg upp í innanhýsis viðurskifti í øðrum londum. Onkuntíð hava tey gjørt tað fyrr, men tá hava tey roynt at fingið undirtøku fyri tí frá ST, og tað sær man ikki longur.

Man kann ímynda sær, at hetta er ein gongd, sum fer at vinda uppá seg, sigur Hans Andrias Sølvará, og tá sær tað ikki so væl út fyri fólkafátæk lond sum Føroyar og Grønland.