“Besti máti at bøta um haldførið, er at hækka pensjónsaldurin,” heldur landsstýriskvinnan fram. Tey gomlu skulu arbeiða longri.

Pensjónsaldurin er í løtuni 67½ ár, og hann hækkar uppí 68 ár tann 1. juli 2030. Men nú hevur landsstýrið, undir leiðslu av Javnaðarflokkinum, skotið upp at hækka pensjónsaldurin uppí 68½ ár í 2035 og 69 ár í 2038.

Í viðmerkingunum til uppskotið verður leysliga mett, at hvørja ferð pensjónsaldurin hækkar við einum ári, sparir landskassin umleið 50 mió. krónur í fólkapensjónum. So hetta uppskotið fer, um 12 ár, at spara landskassanum 50 mió. krónur í útreiðslum, og fer harafturat at geva nakrar skattakrónur á inntøkusíðuni.

Men tað merkiliga er, at sama samgongan sum heldur hetta vera neyðugt, hevur lækka ríkisveitingin við 25 mió. krónum um árið í fýra fylgjandi ár. Tað vil siga, at samgongan hevur við vilja, bara í hesum valskeiðinum, verra haldførið nógv meira enn hækkaði pensjónsaldurin klárar at bøta um sama haldførið.

Og tey ætla ikki at steðga her. Í summar gjørdu allir flokkar uttan Sambandsflokkurin semju um at skipa Føroyar sum “sjálvstøðugt land”. Lítið er at ivast í, at flokkar sum ikki himprast við at minka ríkisveitingin, meðan undirskotið er stórt, fara eisini at halda fram við sama politikki, bara við meira ferð á, um Føroyar verða sjálvstøðugt land. Væntandi haldførið av hesum mugu pensjónistar og onnur taka sær av.  

Skal restin av ríkisveitingini (542 mió. krónur) eisini fíggjast við hækkaðum pensjónsaldri, so mugu fólk í Føroyum arbeiða til tey eru umleið 80 ára gomul. So her eru bara tveir møguleikar: Annaðhvørt mugu vit hava eina nýggja politiska leiðslu, ella mugu vit øll “spýta í lógvarnar”.

Helgi Abrahamsen
løgtingsmaður