Skilnaðarløtan í gomlu Klaksvíkar kirkju
Hugnaløta var í Christianskirkjuni í dag, har hugleitt var um gomlu Klaksvíkar kirkju frá 1866. Lurtað varð eftir upptøku har Jóhan Nielsen, prestur millum annað talaði um tann týdning, sum kirkjan hevði fyri Klaksvík
Nógv fólk høvdu leitað sær í kirkjukjallaran í dag at hoyra um gomlu Klaksvíkar kirkju.
Øssur Kjølbro, prestur greiddi fyrst frá brotum úr søguni um kirkjuna frá 1866. Brotini hevði hann frá Freydis Poulsen.
Seinasta gudstænastan í gomlu Kirkju varð hildin 30.juni 1963, eina viku áðrenn Christianskirkjan varð vígd. Útvarp Føroya eigur upptøku av síðstu gudstænastuni. Fleiri prestar prædikaðu. Millum annað talaði Johan Nielsen við síni rámligu rødd um skilnaðarløtuna millum kirkjuliðið og gomlu kirkju.
Í fjør varð lurtað eftir upptøku av síðstu prædikuni hjá Johan Nielsen í Christianskirkjuni eitt gott ár seinni.
Einstakir lutir úr gomlu kirkjuni stóðu frammi.
Á hugnaløtuni var eisini sálmasangur, drekkamuður og andakt.