Skipið, ið søkt var á Borðoyarvík í fjørð til kavingarendamál og annað, sum upprunaliga bar navnið Nónhamar, tá tað varð bygt á Skála Skipasmiðju í 60-unum, er nú flutt á grynri vatn.

Longu tá Nónhamar varð søkt, endaði tað einar 5 metrar djúpari enn ætlað. Orsøkin var, at til endamálið hjá okkara einasta føroyska kavaraskúla, Faroe Dive, var mett, at mest hóskandi dýpið til skipið var 20 metrar, men Nónhamar kom at liggja á 25 metrum.

Í mars mánaði í fjør, gjørdi Jón Rasmussen, skipari eina roynd við Norðborg og manning at flyta Nónhamar upp á grynri vatn, men tað bar ikki til. Nú bleiv so ein roynd gjørd aftur við Jupiter.

Sigast má, at Jón hevur lagt stóra orku í hetta átakið, og tað takka vit øll honum fyri, sum standa aftanfyri tiltakið kring Nónhamar projektið.

Í vikuni sum fór, boðaði Jón Rasmussen frá, at ein roynd skuldi gerast aftur leygardagin sum fór. Hann roknaði við, at hann kundi verða á Borðoyarvík við Jupiter eftir góðan fiskitúr eystanfyri umleið klokkan 16 leygardagin.

Jupiter var ímillum Nesjarnar á Víkini umleið ásetta tíð. Tá vóru vit klárir at taka ímóti og fóru við bátum, Ziska, Hagagjógv, Brimil, Birgir og mob bátum at hjálpa til at fáa fatur á endunum, ið vóru festir í Nónhamar, tá fyrra royndin varð gjørd, og at festa teir í endar frá Jupiter.

Men vóru spentir, tá byrjað var at seta á. Nógv orka bleiv brúkt frá Jupiter, skipið legði seg væl á slagsíðu, orsakað av trýstinum og vit kendu, at skipið við botnin flutti seg eitt vet, men so slitnaði.

So var aftur at seta fast og hiva aftur. Aftur hesaferð hildu vit, at skipið á botni flutti seg eitt vet, men so slitnaði aftur. Síðani bleiv ein triðja roynd gjørd, hesaferð gekk betur, men júst tá vit hildu at komið var á mál, slitnaði aftur. Tá var vorðið so myrkt, at avrátt var at gevast. Akkurát hvussu nógv Nónhamar hevur flutt seg má kannast í ljósi ein annan dag.

Undirritaði var við allan dagin og fekk nakrar myndir, sum eg leggi við niðanfyri.