Tíðliga í 1900 talinum vóru fleiri av gomlu motorbátunum ella deksbátunum smíðaðir í Klaksvík, men seinni kom stígur í.

Tá fingust bedingarnar mest við umvælingar og viðlíkahald í nógv ár. Við krígslok lat Kjølbro fýra útróðrarbátar byggja í Føroyum. Støðin (seinni Brattenni) varð smíðað á Skála, meðan Váðaklettur, Mækjuvík og Varpið vórðu bygdir í Klaksvík. Tað var Jákup Jacobsen ella Jákup í Fuglafirði sum stóð fyri at byggja útróðrarbátin Varpið til Kjølbro á sjálvum Varpinum í 1945, og sum seinni varð longdur í 1955. Árið fyri hevði Jákup umbygt Royndina Fríðu hjá Kjølbro á sama staði. Men so kom stígur í í nógv ár.

Men í fyrru helvt av 1970 árunum smíðaðu Reynhold Jacobsen og aðrir nakrar 20 tons útróðrarbátar á Stongunum. Tann fyrsti av hesum bátunum var Elbjørg, sum Karstin Drenkstein og Asbjørn Vang høvdu bílagt, og sum fór á sjógv í 1971. Árið eftir smíðaðu teir Brøðraberg. Báðir hesir bátarnir høvdu stýrhúsið har frammi. Eftir teir komu Dúgvuberg og Sjóvarmoy, sum eins og hinir vóru súðubygdir, men høvdu stýrhúsið har afturi.

Nakað um somu tíð bygdu Jógvan Olsen ella Jógvan hjá Axel og aðrir nakrir 20 tons útróðrarbátar í niðurlagda fiskamjølsvirkinum hjá Kjølbro norðuri á Grótrætt. Tann fyrsti var Bjørg, sum eiðismenn høvdu bílagt, og tann næsti var Granit, sum Svend Thulesen lat byggja, og sum varð latin honum í 1972. Seinni smíðaðu teir eisini aðrar bátar á Grótrætt, og tann seinasti var Jøkul til Sámal á Snørisvirkinum, sum fór av bakkastokki í 1978. Jøkul var 50 tons og tí væl størri enn hinir bátarnir. Hann er seinasta træskip, sum er smíðað í Føroyum.