Atkvøðugreiðslan er av. Ein samlaður Javnaðarflokkur atkvøddi fyri at fara undir at fyrireika og projektera Suðuroyartunnil, men í Tjóðveldi atkvøddi ein triðingur antin blankt ella ímóti, og í Framsókn atkvøddu tveir triðingar ímóti. 

Javnaðarflokkurin mátti taka eitt leikbrá og fór á innanhýsis floksfund mitt undir tingviðgerðini av Suðuroyartunlinum, tá tað var greitt, at Framsókn ikki helt ta avtaluna, sum løgmaður helt seg hava við flokkin um at bera málið um Suðuroyartunnilin ígjøgnum. Ivaleyst hava mong tingfólk í Javnaðarflokkinum kent seg snýtt, tá nú fleiri teirra søgdu tað vera við ringum tannabiti, at tey kortini atkvøddu hægra pensjónsaldurin ígjøgnum. Tey søgdu seg vera noydd til tað vegna samgonguavtaluna.

Men í Framsókn var onki tilsvarandi krav sett tinglimunum um, at tey skulu viðvirka til at bera málið um Suðuroyartunnil ígjøgnum. Framsóknarfólk atkvøddu tí ikki fyri nøkrum við ringum tannabiti, men sum tey sjálvi vildu.

Um andstøðan ynskti at spælt samgonguni eitt puss og atkvøtt ímóti Suðuroyartunlinum, so hevði málið fallið í kvøld, tí 3 samgonguatkvøður vóru ímóti og 1 var blonk.

Og tað kann andstøðan framvegis gera til 3. viðgerð.

Spurningurin er so, um javnaðarfólk eisini fara at atkvøða kollektivt ”við ringum tannabiti” hósdagin, meðan tingliminir í hinum samgonguflokkunum atkvøða, sum teimum lystir.

Í øllum førum avhongur lagnan hjá Suðuroyartunlinum nú av náði frá andstøðuni.