Uppskotið um Suðuroyartunnil samtykt - nýval útskrivað
Eftir 4½ tíma av viðgerð av einum broytingaruppskoti hevur Løgtingið loksins atkvøtt um málið um projektering, fyrireiking og útboð av Suðuroyartunlinum. Úrslitið gjørdist, at broytingaruppskotið fall, meðan upprunauppskotið frá løgmanni varð samtykt. Beint eftir útskrivaði løgmaður val.
Tað vóru Árni Skaale (A), Johan Dahl, Magnus Rasmussen og Frimodt Rasmussen (B), eins og Liljan Weihe og Erling Eidesgaard (E), ið komu við broytingaruppskoti um at bjóða báðar farleiðirnar út, t.v.s. sokallaðu Múlaleiðina umframt ta, ið løgmaður skeyt upp. Uppskotið hjá teimum seks varð viðgjørt leingi, men fall at enda við 22 atkvøðum ímóti, 10 fyri og einari blankari.
Uppskotið hjá løgmanni fór ígjøgnum við 26 atkvøðum fyri og 7 ímóti, og her var kanska tað mest spennandi, hvussu Karlot Hergeirsson og Bjarni Kárason Petersen úr Framsókn fóru at atkvøða. Teir báðir vóru ímóti við 2. viðgerð, og tað vakti mikið harmaljóð úr Javnaðarflokkinum. Teir atkvøddu aftur ímóti Suðuroyartunlinum, og beint aftaná útskrivaði løgmaður val.
Hetta merkir, at pensjónsaldurin ikki hækkar til 69 ár.