KÍ var betra liðið størsta partin av dystinum móti einum HB-liði, sum spældi nærum uttan álopsleikarar, sum ikki eru tøkir enn. KÍ spældi í eini 5-2-3 leikskipan og tað tóktist ov verjukent allan fyrra hálvleik, tá KÍ skapti lítið í spæli, tí tað vóru so sjáldan nógvir leikarar við í álopi, tá tríggir miðverjar umframt tveir miðvallarleikarar – ofta - vóru eftir langt afturi.

Fyrra part av seinna hálvleiki hevði KÍ sítt besta tíðarskeið og skoraði eisini eftir hornaspark, sum Árni Frederiksberg sendi innfyri til Jákup Biskopstø, sum umvegis Filip Brattbakk sambært dómaraseðlanum skoraði. KÍ hevði aðrar stórar málmøguleikar, men fekk ikki stongt dystin. Móti endanum royndi HB at leggja trýst á og onkur spent støða var.

Hjá KÍ var talan stórt sæð um sterkastu uppstilling, men Jákup N. Vilhelmsen fekk møguleikan í miðverjuni og hann tók av. Hjá KÍ hevði tað týdning, at liðið reisti seg eftir avrikið og úrslitið móti B36. Søgan sigur, at kappingarárini roynast betri, tá KÍ vinnur stórsteypadystin.