Barsilsúgjaldið skal hækkast, og foreldur skulu fáa 10 ”umsorganardagar”, fram til at barnið er 7 ár. Somuleiðis skal ein kunna fáa umsorganardagar at passa eldri (her stendur ikki hvussu nógvar), og at man skal fáa betri samsýning fyri tað. Tímalønt skulu eisini javnsetast við fastlønt í sjúkradagaskipanini. Landsroyndirnar í skúlanum skulu avtakast, sigur flokkurin eisini.

Tað sær út til, at Javnaðarflokkurin vil halda hurðina opna fyri samgongu við Sambandsflokkin komandi val, tí valskráin sigur, at flokkurin ikki vil lækka blokkstuðulin enn meira, og eiheldur yvirtaka dýr málsøki, so leingi hall er á fíggjarlógini. Hetta eru heilt øðrvísi tónar enn í farna valskeiði, har blokkurin varð lækkaður á hvørjum ári hóast stór hall í landsbúskapinum.

Blotnað er í ynskinum um hægri pensjónsaldur. Nú skal hann gerast smidligari og vera ymiskur alt eftir borgaranum og hansara arbeiðslívi. Og hesa ferð skulu fakfeløgini takast við, stendur í valskránni. Tað sama, ein bleytari formulering, ger seg galdandi um Suðuroyartunnilin. Nú eitur tað seg, at ”VIT VILJA – bora Suðuroyartunnil um tað er fíggjarliga ráðiligt”.

Men eisini endurtikin vallyfti eru við, hóast flokkurin hevur sitið í samgongu í 4 ár og ikki loyst málini. Javnaðarflokkurin lovar enn eina ferð at ”seta hol á arbeiðið at stytta arbeiðsvikuna”; nakað sum miseydnaðist púrasta inniverandi valskeið, tí samgongupartnarar vóru ímóti. Tað má so merkja, at Javnaðarflokkurin fer eftir aðrari samgongukonstellatión hesa ferð. Ein annar gamal travari, ið er grivin upp aftur, er skattafrádráttur fyri fakfelags-limagjald, og ein triði travari er campusverkætlanin, sum eisini verður lovað enn eina ferð.

Øll valskráin hjá Javnaðarflokkurin sæst við at trýsta her.