Fyri tað fyrsta, so er 10. sum er, longu eitt val. Her í Klaksvík eitur skúlin enntá Valskúlin. Tað er ikki krav at taka 10. flokk, og eitt 9. floksprógv gevur atgongd til allar miðnámsútbúgvingar.

Tey ungu kunnu sjálvandi eisini velja at fara út at arbeiða eftir 9., og víðari har tey ætla sær, eftir tað. Nógv arbeiða eisini longu, meðan tey ganga í fólkaskúlanum.

Útbúgvingin í Hovi til námsfrøðihjálpara krevur eitt 9. floksprógv, pluss eitt ára starvsroyndir eftir tað. Ella eitt 10. floksprógv. Orsøkin er, at so eru næmingarnir tað búnari, tá tey koma á skúlan.

Og tað er just tað 10. flokkur er til. Eitt ár at búnast í. Eitt ár at nema við nøkur onnur ting enn bert tað fakliga. Eitt ár at hugsa seg um í, og finna útav, hvat tey vilja aftaná fólkaskúlan. Og ikki minst: Ein møguleiki at betra um sítt 9. floksprógv, um tørvur er á tí.

Tað er óunnilig tankagongd, at vilja taka hetta tilboðið frá teimum.

Latið tey ungu sjálvi hava valið.