Miðaltøl ella ”outliers”?
Nakað av kjaki hevur verið um, at formaðurin í Búskaparráðnum brúkar miðaltøl sum grundarlag fyri at siga, at keypiorkan hjá føroyingum er vunnin inn aftur. Sonja Jógvansdóttir, samskipari hjá Verkafólki, sigur, at tað ikki er galdandi fyri verkafólkini her á landi. Og hetta evnið var aftur uppi á valfundinum í Varpinum í gjárkvøldið.
Ein av áhoyrarunum í salinum, ið eisini er valevni fyri Sambandsflokkin, segði á valfundinum í gjár, at hon kendi seg ikki sørt provokeraða av, at Eirikur í Jákupsstovu, landsstýrismaður og valevni fyri Tjóðveldi, segði, at vælferðin í Føroyum er batnað. Sjálv hevur hon ein son, sum ikki fær hjálp fulla tíð, eins og ein svigarinna hennara hevur ein son, sum hevur staðið á bíðilista í 5 ár.
Eirikur í Jákupstovu svaraði, at hann sum fyrrverandi landsstýrismaður í almannamálum væl visti, hvussu trupult tað var, og hvussu nógvar av teimum skipanunum, sum eru í gildi, ikki eru settar rætt saman. Men hann endurtók, at vælferðin sum heild er hækkað. Men so viðgekk hann eisini, at har eru heilt nógv, hóast einstøk, dømi um, at politiska skipanin ikki ger arbeiðið hjá sær nóg væl.