Týsdagin spælir U21 fótbóltslandsliðið EM-dyst í Klaksvík. Tveir KÍ-spælarar eru við í U21 hópinum. Teir eru málmaðurin Ári í Haraldsstovu Petersen og verjuspælarin Børge Petersen
Føroyska U21 landsliðið spælir týsdagin kl. 17:30 EM-undankappingardyst ímóti Grikkalandi í Klaksvík.
Føroyar eru í bólki G saman við Portugal, Kroatia, Grikkalandi, Hvítarusslandi og Andorra. Føroyar hava higartil fingið 7 stig í 7 dystum og eru nummar 4 av teimum 6 londunum í bólkinum. Grikkaland er nummar 3 í bólkinum.
Føroyar hava tríggjar dystir eftir at spæla, og teir vera allir á heimavølli. Týskvøldið vitjar Grikkaland, og í oktober koma Portugal og Hvítarussland til Føroya at spæla.
U21 landsliðið hevur heimavøll í Klaksvík, og í fjør vóru tveir sera spennandi og undirhaldandi dystir spældir í Klaksvík.
Fyri nøkrum døgum síðani høvdu Føroyar eitt sera gott avrik á útivølli ímóti Kroatia. Tíverri taptu Føroyar 2-1, men U21 menninir ætla at fáa nakað burtur úr dystinum í Klaksvík týskvøldið.
Tveir KÍ-spælarar eru við í U21 hópinum. Teir eru málmaðurin Ári í Haraldsstovu Petersen og verjuspælarin Børge Petersen.
Sunnudagin vandi U21 landsliðið í Klaksvík, og í dag klokkan 12 venja teir aftur við Djúpumýri.
