Ímorgun kom Sundaberg í Ánir við 385 tonsum av svartkalva, ið teir hava fingið við Grønland.
Frá reiðarínum frætta vit, at Sundaberg hevur verið burtur í smáar tveir mánaðir, og at teir hava roynt við Eysturgrønland og Vesturgrønland.
Fiskiskapurin hevur verið brúkiligur og leggur Sundaberg nú upp 385 tons av svartkalva í nýggju frystigoymsluna í Ánunum.
Sagt verður, at meginparturin av veiðuni verður seldur til Japan.
22 mans hava verið við Sundabergið hendan túrin. Roknað verður við, at Sundaberg fer í Barentshavið næsta túr, og tað verður helst ikki fyrr enn eftir nýggjár, um so er at kvotan tá er komin upp á pláss.
