Unglingaliðið hjá Kl. Talvfelag var mikukvøldið í Havn og telvaðu oddadyst ímóti Havnini, sum vann 2½-1½, men Klaksvík er framvegis ovast á stigatalvuni.
Í liðkappingini í talvi varð sætta og triðseinasta umfar í unglingadeildini telvað mikukvøldið 7/1-09 kl. 18:00, har oddadystur var millum Havnina og Klaksvík í Havn.
Undan hesum dystinum var støðan í unglingadeildini henda:
1) Klaksvík 13,0 stig
2) Havnin 9,0 stig
3) Sandavágur 6,5 stig
4) Vestmanna 5,5 stig
5) Rókur 4,0 stig
Sambært upplýsingum á heimasíðu Talvsambandsins var úrslitið av oddadystinum mikukvøldið hetta:
Havnin – Klaksvík 2½ – 1½
1. Heidrikur – Hedin Gregersen ½ – ½
2. Sára – Einar Gregersen 1 – 0
3. Johan – Dánjal Petur Jacobsen 0 – 1
4. Rúni – Leivur í Buð 1 – 0
Sigast má, at tað hevur higartil gingið strúkandi hjá Klaksvík í unglingadeildini.
Hóast henda tepra ósigurin er liðið framvegis á odda við 14,5 stigum, meðan Havnin er nr. 2 við 11,5 stigum.
