Stabila veðrið við gráum lofti og í nógvum støðum mjørka verður avbrotið í vikuskiftinum, men vit skulu rokna við at fáa tað aftur í næstu viku.
Vit hava eitt lítið lágtrýst um okkara leiðir, og tí fer ættin at vera skiftandi í dag og fram til fyrrapartin í morgin. Eftir tað fer eitt brúgvalag úr einum øðrum lágtrýsti at leggja leiðina framvið, og tí verður váttligt í morgin.
Fyri tað sum eftir er av degnum í dag er eitt lítið lot av ymsum ættum, minni enn 5 m/s, skýggjað ella hálvskýggjað og ælaveður, í støðum mjørki. Í kvøld og í nátt yvirhøvur turt.
Hitin í dag 8 til 13 stig.
Fyrrapartin í morgin er eitt lítið lot av ymsum ættum, minni enn 5 m/s, samdrigið og okkurt ælið, í støðum mjørki. Seinnapartin lot til frísk lot av landsynningi, 3 til 8 m/s, samdrigið og sum frá líður regnar. Um kvøldið gongur hann niður ímóti suðuri, og sum frálíður slítur í, tó ælaveður í støðum.
Hitin í morgin 9 til 12 stig.
Sunnudagin er eitt lítið lot av ymsum ættum, minni enn 5 m/s, samdrigið og okkurt ælið, í støðum mjørki. Um kvøldið ælaveður og um náttina samregn.
Hitin í ovurmorgin 9 til 12 stig.
Góða Norðoyastevnu.
